Na Seif Gracien Hasingizwimana/Kigali,Rwanda,
Utafiti mpya umeonyesha kuwa kunaweza kuwa na chui kati ya 45,000 na 143,000 mwituni katika eneo la Afrika chini ya Jangwa la Sahara, ingawa idadi hizi zinatofautiana na tafiti zilizopita zilizotoa nambari tofauti.
Watafiti wa uhifadhi wa wanyamapori kutoka Chuo Kikuu cha Nottingham Trent nchini Uingereza wanasema kuwa ingawa idadi ya sasa ya chui inaweza kuwa ndogo kuliko ilivyodhaniwa hapo awali, Afrika inaweza kuwa na uwezo wa kuhifadhi hadi chui 176,000 katika makazi yao ya kihistoria, mradi tu hatua zinazofaa za ulinzi zichukuliwe.
Watafiti walibainisha kuwa idadi hizi si sensa kamili ya chui wote, kwani data nyingi zilikusanywa kutoka maeneo yaliyohifadhiwa ambapo wanyamapori wana afya bora ikilinganishwa na maeneo yanayokaliwa na watu au ya kilimo.
Utafiti huo ulionyesha kuwa idadi ya chui hupungua sana katika maeneo yenye shughuli nyingi za kibinadamu, hasa pale ambapo kuna mifugo, vijiji vilivyo karibu, na kilimo kilichoenea. Walionekana kwa wingi katika maeneo yenye mawindo tele, hasa wale wanaoliwa na chui, kama vile wanyama wenye kwato na nguruwe mwitu.
Utafiti huo pia uliibua wasiwasi mkubwa kuhusu uwindaji wa chui kwa ajili ya nyara, ukionyesha kuwa viwango rasmi vya uwindaji katika zaidi ya nusu ya nchi zilizofanyiwa tathmini vinazidi viwango endelevu.
Watafiti wanasema kuwa idadi ndogo ya chui dume waliokomaa, kati ya 2,800 na 8,700, wanaishi nje ya maeneo yaliyohifadhiwa katika nchi zinazoruhusu aina hii ya uwindaji.
Watafiti wanabainisha kuwa utafiti huu unatoa muundo wa kutambua mahali ambapo juhudi za uhifadhi zinapaswa kuelekezwa, ikijumuisha ulinzi wa makazi, kuongeza idadi ya mawindo, kupunguza migogoro kati ya binadamu na chui, na kuwarudisha chui pale inapobidi.
Antonio Uzal, profesa mshiriki wa uhifadhi wa wanyamapori katika Chuo Kikuu cha Nottingham Trent, alisema kuwa ukosefu wa data ya kuaminika unafanya iwe vigumu kwa serikali na mashirika ya uhifadhi wa mazingira kuunda mipango madhubuti ya kulinda na kuongeza idadi ya chui.
Alieleza kuwa utafiti huu unatoa mwongozo wa vitendo ili kusaidia katika uhifadhi wa chui na kuweka malengo maalum kulingana na maeneo ambayo msaada unabainika kuhitajika.
Julien Fattebert, mwandishi mwenza wa utafiti huo na mtafiti katika Chuo Kikuu cha Vilnius nchini Lithuania na Chuo Kikuu cha Nelson Mandela nchini Afrika Kusini, alisisitiza haja ya haraka ya kurekebisha viwango vya uwindaji wa chui kulingana na data mpya ili kuzuia kupungua kwa wanyama hawa.
Watafiti wanashauri kuwa katika maeneo yasiyohifadhiwa ambapo ukubwa wa idadi ya chui bado haujulikani wazi, kipaumbele kinapaswa kutolewa katika kuwafuatilia kwa kutumia kamera za mtego (camera trapping) na kurejesha makazi yao.
Kalpapran Patowary, mwandishi mkuu wa utafiti huo na mwanafunzi wa PhD katika Chuo Kikuu cha Clemson nchini Marekani, alisema lengo kuu lilikuwa kuelewa hali ya chui katika kanda tofauti za Afrika chini ya Jangwa la Sahara.
Alitaja kuwa muda na rasilimali zinapaswa kuelekezwa katika maeneo ambayo chui wanaweza kuwa bado wapo lakini hawajawakilishwa vya kutosha katika utafiti, hasa katika nchi za Afrika Magharibi.
