By Seif Shaggy Gracien Hasingizwimana/Kigali,Rwanda,
Abanyarwanda barasabwa kongera ingano y’amavuta ari mu mafunguro yabo ikagera nibura ku kigero cya 26%, aho kuba 10%, mu rwego rwo kugaburira umubiri wabo intungamubiri ziwufasha gukora neza.
Dr Christine Mukantwari, ushinzwe agashami k’imirire muri FAO mu Rwanda, avuga ko umuntu akenera indyo igizwe n’amoko 12 y’ibiribwa, muriyo harimo ibinyampeke, ibinyamafufu, ndetse n’imbuto zikungahaye kuri Vitamini A ifasha umuntu kubona neza, no gukomeza ubudahangarwa bw’umubiri, inyama, amafi, amata, amagi, ibinyampeke, n’ibinyobwa.
Dr Mukantwari yavuze ko mu binyobwa umubiri ukeneye harimo amazi.
Ati”Mu bwoko 12 bw’ibyo kurya umuntu akeneye buri munsi, iyo wariye inyama ntuba ugomba kwihutira gushaka amagi.mugihe kandi wariye amagi na bwo si ngombwa kongeraho inyama kuko ushobora guhitamo kimwe muri byo. Iyo uriye amagarama 300 biba bihagije. Icy’ingenzi ni uko buri wese arya ibinyampeke akongeraho intungamubiri za protein ziva mu magi cyangwa ku bikomoka ku matungo, bikamufasha kugira ubuzima bwiza.”
Dr Mukantwari, avuga ko nyuma y’ibyo byose umuntu agomba no kwibuka gushyira mu mafunguro amavuta ariko adakabije.
Ati: “Muri rusange umubiri wacu ukenera amavuta ariko atari menshi, ntabwo ari byiza kurya amavuta menshi ugomba gutekesha make kuko afasha umubiri kongera intungamubiri ziri mu byo wariye, zikajya mu mara mato, zigakomereza mu maraso zigafasha umubiri gukora neza.”
Yongeyeho ko nubwo amavuta menshi atari meza ku buzima, Abanyarwanda bakiyarya ku gipimo kiri hasi.
Ati: “Amavuta menshi ni mabi ku mubiri, gusa hano mu Rwanda turya amavuta ku gipimo cya 10% kandi dusabwa kuyarya ku kigero cya 26%. nubwo bimeze bityo, hano iwacu tweza avoka ushobora kuyishyira kubyo ugiye kurya icyogihe ubuhaye umubiri amavuta arimo intungamubiri. Bivuze ko n’utariye amavuta y’ubuto ku isahani y’ibiryo icyo gihe biramufasha.”
Dr Mukantwari avuga ko ubushakashatsi bwakozwe muri 2024 bugaragaza ko imiryango 5% gusa ari yo ibasha kubona inyama, amata, amagi n’amafi.
Ati: “Imiryango 95% ntibona ibikomoka ku matungo. Iyo babajije urugo niba mu minsi irindwi ishize rwarariye inyama rukavuga ati Oya, ahoniho ubushakashatsi bwaturutse. Usanga Abanyarwanda ahanini birira ibinyamafufu n’ibinyampeke birimo ibishyimbo, imyumbati n’amashaza, bakabiherekesha imboga rwatsi kubera ubukangurambaga bwakozwe bw’uturima tw’igikoni, ugasanga abantu barazirya kuko zihari.”
Dr Christine, akomeza avuga ko amata na yo akiri make, kimwe n’inyama, bityo buri wese akwiye gushyira imbaraga mu kongera ibikomoka ku matungo haba mu rugo no ku isoko.
Ati”Kurya byinshi si cyo cy’ingenzi kuko umubiri ukenera imbaraga ziri hagati ya 2200 na 3200 ku munsi, zivuye ku binyampeke, imbuto, inyama, amafi n’amagi muri rusange. buri munyarwanda wese akwiye gushyiraho uruhare kugirango biboneke kuko batubwira ko tugeze ku mpuzandengo ya 2329 ku munsi.Ati”muri rusange turarya, nta kibazo cy’inzara dufite kandi abantu bafite imbaraga zo gukora imirimo yabo, ariko hasigaye kumenya ibyo umubiri ukeneye byose kugira ngo umuntu akomere, akure neza kandi atekereze neza.”
Ibarura ryakozwe muri 2022 rigaragaza ko 69% by’Abanyarwanda bakora imirimo y’ubuhinzi n’ubworozi, barimo 26,8% bakora ubuhinzi gusa, 64,2% bakora ubuhinzi n’ubworozi icyarimwe, mu gihe 9% bakora ubworozi gusa.
Iryo barura kandi ryagaragaje ko ingo miliyoni 1,7 zoroye nibura itungo rimwe. Muri zo, 28% zoroye inka, 19% zoroye ihene, 15% zoroye ingurube, 12% zoroye inkoko, 6% zoroye ingurube, mu gihe izisigaye zoroye andi matungo arimo inzuki n’intama.
Byitezwe ko umusaruro w’inyama z’inka uzava kuri toni zirenga ibihumbi 76 aho muri 2028/2029, inyama z’ihene zizava kuri toni zirenga ibihumbi 36 zigere kuri toni zirenga ibihumbi 41, iz’intama zive kuri toni ibihumbi 10 zigere kuri toni ibihumbi 11.
Inyama z’inkoko byitezwe ko zizava kuri toni ibihumbi 58 zigezwe kuri toni ibihumbi 65 mu 2028/2029 ingurube zizavanwa kuri toni zirenga ibihumbi 26 zigezwe kuri toni ibihumbi 29, amafi ave kuri toni ibihumbi 59 agezwe kuri toni ibihumbi 77.
